په نیمروز پوهنتون کې د اداري مراسلاتو تر سرلیک لاندې یو ورځنی روزنیز سمینار ترسره شو

د اداري کارکوونکو د پوهاوي کچې لوړولو، د اجراآتو د کیفیت ښه والي او اداري چارو ته د چټکتیا ورکولو په موخه، د نیمروز پوهنتون د ظرفیت لوړونې مدیریت له لوري د «اداري مراسلاتو» تر سرلیک لاندې یو ورځنی روزنیز سمینار ترسره شو.

یاد سمینار د نیمروز پوهنتون د مالي او اداري چارو مرستیال مولوی حافظ فضل احمد شهیدزاده او د پوهنتون د ټولو اداري کارکوونکو په ګډون د کمپیوتر لب په تالار کې ترسره شو.

سمینار د قرآن کریم د څو مبارکو آیتونو په تلاوت سره پیل شو.

وروسته د ښوونې او روزنې پوهنځي علمي کادر غړي پوهنیال جلیل محمدی د «اداري مراسلاتو» موضوع د سلایډونو له لارې په تفصیلي ډول تشریح کړه. نوموړي د اداري مراسلاتو اصول، طریقې او د ادارو د چارو په پرمختګ کې د هغو اهمیت روښانه کړ او د ګډونوالو پوښتنو ته یې هم قناعت‌بخښونکي ځوابونه وړاندې کړل.

د پروګرام ګډونوالو د دغسې روزنیزو سمینارونه جوړول د کارکوونکو د مسلکي ظرفیت په لوړولو او د اداري اجراآتو د بهیر په ښه والي کې اغېزمن وبلل او د ورته پروګرامونو پر دوام یې ټینګار وکړ.
یاد روزنیز سمینار د خیر په دعا سره پای ته ورسېد.
پنج‌شنبه
۲۱ غبرګولی ۱۴۰۵ هـ.ش
۲۶ ذوالحجه ۱۴۴۷ هـ. ق