د نیمروز پوهنتون د ټولو کارکوونکو لپاره د اخلاقي چلند د پالیسۍ د تشریح سیمینار ترسره شو
د اخلاقي چلند د پالیسۍ د تشریح سیمینار د نیمروز پوهنتون د علمي او محصلانو چارو معاونیت له لوري، د دې علمي مرکز د دعوت او ارشاد آمریت په همکارۍ، د علمي کادر غړو او اداري کارکوونکو لپاره ترسره شو.
په دغه سیمینار کې په اکادمیک چاپېریال کې د اخلاقي او انضباطي اصولو او معیارونو د رعایت پر اهمیت، د علمي کادر غړو او اداري کارکوونکو پر مسئولیتونو او د سالم اکادمیک چاپېریال په رامنځته کولو کې د هغوی پر رول اړوند معلومات وړاندې شول.
د نیمروز پوهنتون د کیفیت لوړونې او علمي اعتبار ورکونې آمر، مولوي عبدالجلیل راشد، د سیمینار د وړاندې کوونکي په توګه، د اخلاقي چلند له پالیسۍ سره اړوند بېلابېل موضوعات تشریح کړل. نوموړي د وړاندې کولو پر مهال د علمي او اداري کارکوونکو د اخلاقي پالیسۍ، د محصلانو د اخلاقي او انضباطي پالیسۍ، د نیمروز پوهنتون او رهبرۍ پلاوي د ژمنو او همدارنګه د پالیسۍ د اجرایي او څارنیزې کړنلارې په اړه لازم معلومات وړاندې کړل.
په دغه سیمینار کې ټینګار وشو چې د علمي کادر غړو، اداري کارکوونکو او محصلانو له لوري د اخلاقي، انضباطي او مسلکي اصولو رعایت د اکادمیک چاپېریال په ښه والي، د خدمتونو د کیفیت په لوړولو او د پوهنتون د موخو په تحقق کې مهم رول لري.
د یادونې وړ ده چې د دا ډول اصلاحي او پوهاوي پروګرامونو ترسره کول، کارکوونکو ته د هغوی د مسئولیتونو، د چلند د اصولو او د اکادمیک چاپېریال اړوندو مقرراتو په اړه د لا زیاتې بلدتیا زمینه برابروي.
سهشنبه
۰۳ وږی ۱۴۰۵ هـ.ش
۱۱ ربیعالأول ۱۴۴۸ هـ.ق
#د_خپرونو_او_عامه_اړیکو_عمومي_مدیریت
